Dagoeneko jakingo duzun
bezala, Lezoko Udalak Kontsumo Arduratsuaren I. Azoka antolatu du datorren
azaroaren 26rako. Goizeko 11etatik 14:30 bitartean, Saldise plazan ospatuko den
azoka honen helburua herritarrek hondakinak murriztu eta berrerabilpena
bultzatzearen aldeko jarrerak bereganatzea da. Hain zuzen ere, zuen
seme-alabek, Eskolako Agenda 21 hezkuntza programaren barruan joan den ekainean
Udalari zuzendutako eskaera bati erantzuna ematen dio ekimen honek.
Azokan hondakinak murriztu eta bertako kontsumoa bultzatzeko
hainbat postu egongo da. Besteak beste, herriko ekoizleen postuak, materialak
berrerabiltzeko tailer-gunea, Herriko Ikastetxeen Eskolako Agenda 21aren
postua, Lezoko Udalaren postua…
Elkarte eta partikularrek ere izango dute aukera 2. eskuko
objektuak saltzeko. Dagoeneko, zenbait elkartek jakinarazi du postua jarriko
duela; horien artean, Paleike, Emaus edota Itsas Gela. Korri, Xalto eta Brinko
pailazoak ere azokan egongo dira.
Herritar eta Elkarteen postuak
Azokan, herritar zein elkarteek eskuko edozein material
saltzeko aukera izango dute: arropak, liburuak, jostailuak, etxeko tresnak...
Eroslearentzat behar duen hori prezio onean lortzeko aukera izango da eta,
saltzailearentzat, jada erabiltzen ez dituen gauzei etekina ateratzeko.
Salerosketa truke horrekin, bide batez, hondakinak murrizten dira.
Azaroaren 23ra arte azokan postua jartzeko aukera zabalik
dagoela jakinarazten dizuegu (horretarako 943 492 215 telefonora edo info@izadi21.net e-postara zuzendu
zaitezkete), baina batez ere, larunbat goizean Saldise plazara hurbildu eta
bertan izango dugun giroaz gozatzera gonbidatzen zaituztegu.
Poltsa berrerabilgarria
Azokara hurbiltzen diren herritarrei eguneroko erosketak
egiteko oihalezko poltsa berrerabilgarriak banatuko zaizkie. Guztira, 2.000
poltsa banatuko dira eta, era berean, eguerdiko ordu batak inguruan, udalak
ingurumen arloko hainbat proiektu aurkeztuko ditu eta mokadutxoa eskainiko die
herritarrei.
